மாணவர் உதயகுமார் மரணமும் திமுக-காங்கிரஸ் விரிசலும்

அண்ணாமலை பல்கலைக்கழகத்தில் கருணாநிதிக்குக் கௌரவ டாக்டர் பட்டம் வழங்கும் நிகழ்ச்சி நடந்தது. அந்தப் பட்டத்தை அவருக்கு வழங்கக் கூடாது என்று மாணவர்கள் போராட்டம் நடத்தினார்கள். போராடிய மாணவர்களை அடக்க வேண்டும் என்ற உத்தரவு எங்கிருந்து வந்தது என்பது தெரியவில்லை. ஆனால் அன்று பல மாணவ, மாணவியர் கடுமையாகத் தாக்கப்பட்டார்கள்.

அதில் உதயகுமார் என்ற மாணவர் காணாமல் போனார். அவரது மரணத்துக்குத் திமுகதான் காரணம் என்று எதிர்க்கட்சிகள் குற்றம்சாட்டின. விசாரணை நடந்தாலும், உதயகுமார் மரணத்துக்கான காரணம் பல ஆண்டுகளாக விடை தெரியாமலேயே இருந்தது.

சிம்சன் நிறுவனத் தொழிலாளர் போராட்டத்தை நிறுத்த அன்றைய திமுக அரசு தொழிலாளர்கள் மீது தடியடி நடத்தியதும் வரலாறு என்கிறது இந்தத் தொடர். இப்படிச் சிறு சிறு விரிசல்கள் திமுகவுக்கும் இந்திரா காந்தியின் காங்கிரஸுக்கும் இடையே உருவானதாக வரலாற்றுப் பதிவுகள் சொல்கின்றன. அதன் தொடர்ச்சியாக 1975-ல் இந்திரா காந்தி நாடு முழுவதும் அவசரநிலையைக் கொண்டுவந்தார்.