கத்திக்குத்துக்கு நடுவே 180 பயணிகளைக் காத்த இந்திய வம்சாவளி விமானி

செப்டம்பர் 30-ஐ சுமார் 180 இஸ்ரேலியப் பயணிகள் மறக்க மாட்டார்கள். இந்திய வம்சாவளியைச் சேர்ந்த ஒரு கேப்டனால் அவர்கள் உயிர் தப்பினார்கள். அவர் ஐக்கிய அரபு அமீரகக் குடிமகன் என்றும் சில ஊடகங்கள் கூறுகின்றன. அவரை இஸ்ரேல் பிரதமர் பெஞ்சமின் நெதன்யாகு பாராட்டியுள்ளார்.

அமீரக விமானத்தைக் கடத்த முயற்சி நடந்ததா? ஓமன் நாட்டைச் சேர்ந்த துணை விமானி தீவிரவாதச் செயலில் ஈடுபட்டாரா? இப்படிப் பல கேள்விகளை இந்தச் சம்பவம் எழுப்பியுள்ளது.

விமானத்தில் நடந்தது என்ன?

ஃப்ளைதுபாய் என்பது குறைந்த கட்டண விமான சேவை. இது எமிரேட்ஸ் நிறுவனத்தின் சகோதர நிறுவனம் என்று சொல்லப்படுகிறது. துபாயிலிருந்து டெல் அவிவ் நகருக்குத் தினமும் சுமார் 10 விமானங்களை இது இயக்குகிறது.

வழக்கம் போல 1073 என்ற எண் கொண்ட விமானம் சுமார் 180 பயணிகளுடன் துபாயிலிருந்து டெல் அவிவ் நோக்கிப் புறப்பட்டது. இது போயிங் 737 மேக்ஸ் 8 ரக விமானம். ஜோர்டான் வான்பரப்பில் பறந்து கொண்டிருந்தபோது, சில வினாடிகளில் விமானம் சுமார் 15,000 அடி திடீரெனக் கீழே இறங்கியது. உயரம் மாறுவதைப் பயணிகள் உணரத் தொடங்கினார்கள். ஏதோ பெரிய ஆபத்து நடக்கப்போகிறது, உயிர் போகப்போகிறது என்றே அவர்கள் நினைத்தார்கள்.

அதே நேரம் விமானிகள் இருக்கும் காக்பிட் அறையிலிருந்து பயங்கரமான சத்தம் வந்துகொண்டே இருந்தது. சில பயணிகளும் விமானப் பணிப்பெண்களும் சேர்ந்து காக்பிட்டைத் திறந்து பார்த்தபோது, விமானியும் துணை விமானியும் சண்டையிட்டுக் கொண்டிருந்தார்கள். விமானியின் வயிற்றில் கத்திக்குத்துக் காயங்கள் இருந்தன.

பயணிகள் பயந்து ஒதுங்கியிருந்தால் விமானம் கீழே விழுந்திருக்கும். ஆனால் அவர்கள் துணை விமானியைப் பிடித்து உட்கார வைத்தார்கள். அதன் பிறகு விமானி உடனடியாக அவசர சமிக்ஞை அறிவித்தார்.

அவசர சமிக்ஞை முதல் சவுதி தரையிறக்கம் வரை

விமானி அனுப்பியது "ஸ்க்வாக்" எனப்படும் அவசரக் குறியீடு. பொதுவாக விமானக் கடத்தல் போன்ற ஆபத்துகளின்போது பயன்படுத்தப்படும் குறியீடு இது. இந்தக் குறியீடு வந்தவுடன் அருகில் உள்ள விமான நிலையங்கள் எச்சரிக்கை செய்யப்படுகின்றன.

சவுதி அரேபியாவில் உள்ள ஒரு விமான நிலையம் ரெட் சிக்னல் அறிவித்து, விமானம் தரையிறங்கத் தயாரானது. விமானம் சரியாகத் தரையிறங்கியது. 180 பயணிகளும் உயிர் தப்பினார்கள்.

இவர்களைக் காப்பாற்றியவர் கேப்டன் ஸ்மித் மச்சார். தொடக்கத்தில், இரண்டு விமானிகளும் சேர்ந்தே விமானத்தை வீழ்த்த நினைத்தார்கள் என்று செய்திகள் வெளியாகின. நெதன்யாகு பேசிய பிறகுதான் உண்மை தெளிவானது.

ஓமனைச் சேர்ந்த துணை விமானி, கேப்டன் ஸ்மித்தைக் கத்தியால் குத்தி விமானத்தை நொறுங்கச் செய்யத் திட்டமிட்டிருந்தார் என்றும், வயிற்றில் பல கத்திக்குத்துகள் இருந்தும் உயிரைப் பணயம் வைத்து ஸ்மித் விமானத்தைத் தரையிறக்கினார் என்றும் நெதன்யாகு குறிப்பிட்டார்.

ரகசியப் பயணமும் எழும் கேள்விகளும்

இந்தச் சம்பவம் ஏன் நடந்தது என்பதைப் புரிந்துகொள்ள சில நிகழ்வுகளை இணைத்துப் பார்க்க வேண்டும். இரண்டு நாட்களுக்கு முன்பு நெதன்யாகு அமீரகத்துக்குப் பயணம் செய்தார். அவரது வெளிநாட்டுப் பயணங்கள் வழக்கமாக முன்கூட்டியே அறிவிக்கப்படும். ஆனால் இந்தப் பயணம் மட்டும் ரகசியமாக வைக்கப்பட்டது.

ஈரானுக்கு எதிராக அமெரிக்காவும் இஸ்ரேலும் அடுத்த கட்ட நடவடிக்கைக்குத் திட்டமிடுகின்றனவா, அதில் அமீரகத்துக்கும் பங்கு உண்டா என்ற கேள்விகள் எழுந்தன. இதை உறுதிப்படுத்தவே நெதன்யாகு ரகசியமாகச் சென்றார் என்று ராய்ட்டர்ஸ் செய்தி வெளியிட்டது. மறுநாள் நெதன்யாகு வந்ததை அமீரகம் ஒப்புக்கொண்டது.

2020-ல் அமெரிக்க அதிபர் டொனால்ட் டிரம்ப் முன்னிலையில் இரு நாடுகளும் ஆபிரகாம் ஒப்பந்தத்தில் கையெழுத்திட்டன. அதன் பிறகு இரு நாடுகளுக்கும் இடையே விமான சேவைகளும் நல்லுறவு ஒப்பந்தங்களும் தொடர்ந்தன. அரபு நாடுகளில் போர்ச் சூழல்கள் வந்தபோதும் அமீரகம்–இஸ்ரேல் விமான சேவை பெரிதாகப் பாதிக்கப்படவில்லை. அந்த வகையில் ஃப்ளைதுபாய் அமீரகத்தின் முக்கியமான விமான சேவை.

இந்தச் சூழலில் சில சந்தேகங்கள் எழுகின்றன. நெதன்யாகுவின் ரகசியப் பயணம் நடக்கிறது. அதன் பிறகு அமீரகம்–இஸ்ரேல் நட்பு மேலும் வலுப்படுகிறது. அந்த நட்பைச் சீர்குலைக்கும் வகையில் இப்படி ஒரு சம்பவம் நடக்கிறது. இவை தற்செயலானவையா என்பதே கேள்வி.

அப்படியானால், அமீரகம்–இஸ்ரேல் நட்பை உடைக்கவே இந்த விமானத்தைக் குறிவைத்தார்களா? துணை விமானியின் நோக்கம் என்ன? முதல் கட்ட விசாரணை நடந்து வருகிறது; ஓரிரு நாட்களில் விவரங்கள் தெரியவரும். இதற்கிடையில் நெதன்யாகு கடுமையான எச்சரிக்கை விடுத்துள்ளார். இதற்குப் பதிலடியாக இஸ்ரேல் ஏதேனும் நடவடிக்கை எடுக்கலாம் என்பது தமிழ் பொக்கிஷத்தின் பார்வை.

எது எப்படியிருந்தாலும், மக்களைக் காப்பாற்றியவர் ஒரு இந்தியர் என்பதால் இந்தச் சம்பவத்தில் இந்தியாவின் பெயரும் இணைந்துள்ளது. 15,000 அடி திடீரெனக் கீழே இறங்கிய விமானத்தை, கத்திக்குத்தால் உயிர் போகும் நிலையிலும் சரிசெய்து 180 பேரைக் காப்பாற்றியது மிக அரிதான துணிச்சல். அந்த விமானிக்குத் தமிழ் பொக்கிஷத்தின் வணக்கம்.